Арстан Алайдын өлүмүнө №31 түзөтүү мекемесинин 5 кызматкери айыпталып, бири тергөө учурунда көз жумду

Башкы прокуратура билдиргендей, алар Кылмыш-жаза кодексинин 348-беренеси («Шалаакылык») боюнча айыпталууда. Ишти Аламүдүн райондук соту карап жатат. 

Арстан Алай 2023-жылдын 15-декабрында диндер аралык кастыкты козутууга багытталган чакырыктарды жасоого айыпталып кармалып, декабрдын аягында  психиатрдын сунуштамасына ылайык, №31 дарылоо мекемесине которулган.

Анын каза тапканы 5-январда белгилүү болгон. Жаза аткаруу кызматы ал өз өмүрүнө кол салып көз жумганын айткан. Абдылдаевдин мойнунда электр чайнегинин зымынын изи калган.