Үйүндө таштанды жана адамдын заңы толуп калган. Казакстанда кейиштүү шартта жашаган балдар табылды
Алматыда батирлердин биринен «маугли»- балдар табылды. Tengrinews.kz кабарчысы маалымдагандай, үч бала бир нече жылдан бери Алматынын Медеу районунда апасы менен жашап, бирок ата-энесинин кароосусуз жана көзөмөлсүз калган.
Документтерге ылайык, 2016-жылы эки бала, 2020-жылы алардын иниси төрөлгөн. Кошунасы айткандай, балдар кейиштүү абалда жашап келишкен. Алар жашаган батирде таштанды жана адамдын заңы толуп калган. Ошондой эле кошунасынын айтымында, кичүү баланын кийими да жок болгон.
Ошол эле учурда балдардын эң кичүүсү аутизм менен жабыркашы мүмкүн болгон. «Аны менен күрөшүү керек, ал абдан арык, эгер бир нерсе болуп калса башы менен дубал сүзөт», — дейт кошуна аял.
Бир нече күн мурун үч бала тең Алматыдагы оор кырдаалдагы балдарды колдоо борборуна жеткирилген. Ал жердеги кызматкерлер балдардын апасы ичкиликке берилип кеткенин, ал эми атасы чогуу жашабай турганын билдиришкен.
