Эркин күрөштөгү өжөрлүгү менен өзгөчөлөнгөн Эрназар Акматалиев
Жайкы Олимпиада оюндарына саналуу гана күндөр калды. Спорттук күрөштүн түрлөрү боюнча мелдештер 5-августта башталат. Анын ичинен эркин күрөш боюнча беттештер 10-11-августта болот. Мында 65 кг салмак категориясында Эрназар Акматалиев килемге чыгат.
Олимпиаданын бүйүр кызыткан мелдештерине чейин 26 жаштагы балбан Эрназар Акматалиев тууралуу кыскача маалыматтарды топтодук.
Өмүр баяны: Эрназар Акматалиев 1998-жылы 2-июлда Нарын облусунун Нарын районунун Орто-Нура айылында туулган. Эркин күрөш боюнча эл аралык даражадагы спорт чебери Нарындагы Т.Сатылганов атындагы мектепте билим алган. Андан соң Ш.Сыдыков атындагы республикалык спорттук колледжде окуган.
Спорттогу жетишкендиктери:
- Кадеттер арасында Азия чемпионатынын коло медалынын ээси (2015);
- Юниорлор арасында Азия чемпионатынын күмүш медалынын ээси (2018);
- Азиялык лицензиялык турнирде жеңишке жетип, Токио Олимпиадасына жолдомо уткан (2021);
- Кыргызстандын чемпионатынын күмүш медалынын ээси (2021);
- Дүйнө чемпионатынын күмүш медалынын ээси (2021);
- 23 жашка чейинкилер арасында Дүйнө чемпионатынын алтын медалынын ээси (2021);
- Кыргызстандын чемпионатынын алтын медалынын ээси (2022);
- V Ислам шериктештик оюндарынын алтын медалынын ээси (2021);
- Дүйнө чемпионатынын коло медалынын ээси (2022);
- Дүйнө кубогунун коло медалынын ээси (2022);
- Азия чемпионатынын күмүш медалынын ээси (2022).
Мамлекеттик сыйлыктары: Кыргызстандын эркин күрөш боюнча улуттук курама командасынын мүчөсү Эрназар Акматалиев КР Ардак грамотасы менен сыйланган (2021).
