УКМК Чүй университетине байланыштуу жүргүзүлүп жаткан тергөө боюнча маалымат берди
Бул тууралуу УКМКнын басма сөз кызматы билдирди.
Кыргыз Республикасынын Улуттук коопсуздук мамлекеттик комитети С.Мамбеткалиев атындагы Чүй университетине байланыштуу жүргүзүлүп жаткан тергөөдө социалдык тармактарда тарап жаткан айрым маалыматтар боюнча түшүндүрмө берүүнү зарыл деп эсептейт.
Ушул жагдайда белгилеп кетүү керек: КР Жазык кодексинин 222-беренесинин 2-бөлүгүнүн 1-пунктунда каралган кылмыштын белгилери — кылмыш жолу менен алынган кирешелерди легалдаштыруу (адалдоо) фактысы боюнча козголгон кылмыш ишинин алкагында тиешелүү тергөө-ыкчам иш-чаралары жүргүзүлүп, төмөнкү жагдайлар аныкталды.
1994-жылы билим берүү мекемесин куруу үчүн — ошол кездеги республикалык жогорку колледжге (маркум) С.Мамбеткалиевдин атынан, азыркы «С.Мамбеткалиев атындагы Чүй университетине» Бишкек шаарынын Суюмбаева–Осмонкула (мурунку Карпинский жана Набережная) көчөлөрүнүн кесилишинде жайгашкан 1,10 га жер тилкеси бөлүнүп берилген.
С.Мамбеткалиев каза болгондон кийин университетти анын кызы — Чолпон Султановна Мамбеткалиева де-факто жетектеп келген. Бирок 30 жылдан ашуун убакыт ичинде билим берүү тармагын өнүктүрүүнүн ордуна, ректордук тараптан аталган 1,10 га жер тилкеси бөлүнүп, өз алдынча участкаларга айландырылып, үчүнчү жактарга сатылган жана алардын багыты да өзгөртүлгөн.
Мында, сатылган эки участокто көп кабаттуу турак үйлөр курулуп, калган бөлүгү болсо негизги багытына туура келбеген ишмердүүлүккө пайдаланылып, фаст-фуд соода түйүндөрүнө ижарага берилген.
Айрыкча белгиленери: университетке тиешелүү аймактын бир бөлүгү жеке менчикке чыгарылып, ал жакка кымбат турак-үй — эки кабаттуу жеке үй курулган. Азыркы учурда анда ректор Чолпон Мамбеткалиеванын үй-бүлөсү жашайт.
Мамлекеттик мүлктү жеке кызыкчылык максатында пайдаланууга көзөмөл органдарынын көмөстөн көмөктөшүүсү жана лоялдуу мамилеси шарт түзгөн. Натыйжада Мамбеткалиевдердин үй-бүлөсү материалдык пайда алып, билим берүү мекемесин жеке мыйзамсыз баюунун булагына айландырган.
Жүргүзүлүп жаткан тергөө — мыйзамсыз чыгарылып кеткен мүлктү аныктоого жана аны мыйзамда белгиленген тартипте мамлекеттик менчикке кайтарууга багытталган.
Ошону менен бирге, компетенттүү органдар университеттин окуу процессин да текшерүүгө алышат. Анткени документ жүзүндө 800гө жакын студент катталган деп көрсөтүлгөнү менен, чыныгы саны кыйла аз. Бул болсо сабакка жана квалификациялык экзамендерге катышпаган адамдарга диплом берилип жатканын далилдеп турат.
Параллелдүү түрдө Билим берүү, илим жана инновациялар министрлиги студенттерди башка колледждерге жана ЖОЖдорго кайра бөлүштүрүү боюнча тиешелүү иштерди жүргүзүүдө.
УКМК бул багыттагы иштерди улантат жана тергөөнүн жүрүшү, ошондой эле жыйынтыктары тууралуу коомчулукка кошумча маалымат берип турат.
Ошону менен катар, С.Мамбеткалиева социалдык тармактарда атайылап жарандарда боор ооруу жана эмоциялык боо тартуу сезимдерин жарата турган билдирүүлөрдү жарыялап жатканын белгилейбиз. Мындай мүнөздөгү контент көп учурда кеңири аудиториянын көңүлүн буруу, коомдук пикирди керектүү нукка буроо же жеке кызыкчылыкты көздөй пайдалануу максатында колдонулат.
