Time: Иранда нааразылык акциялардан каза тапкандардын саны 200дөн ашты
Тегерандын борбордук бөлүгүндө нааразылык акцияларында ок атуу учурунда 217 адам каза тапты. Бул тууралуу Time журналы Ирандагы клиникалардын биринин дарыгерине шилтеме берип жазды.
Журналдын маектешинин айтымында, каза болгондордун сөөктөрү шаардын алты ооруканасында болгон. Алардын көпчүлүгүнүн өлүмүнө ок жаракаттары себеп болгон. Time булагынын билдиришинче, 9-январда сөөктөр медициналык мекемелерден чыгарылган.
Ирандык булактар нааразылык акцияларындагы курмандыктардын саны боюнча башкача маалымат беришүүдө. HRANA укук коргоо уюмунун эсебине ылайык, дээрлик эки жуманын ичинде Иранда кеминде 65 адам каза тапкан. Алардын ичинен 50си акцияларга катышкандар, 14ү күч түзүмдөрүнүн кызматкерлери.
Time журналы HRANA келтирген сандардын тактыгын текшере албай турганын белгиледи. Ошол эле учурда журнал уюм жеке өздүгү так аныкталган адамдарды гана эсепке аларын кошумчалады.
Tasnim агенттиги өлкө бийлигинин маалыматына таянып, Ирандагы башаламандык учурунда нааразылыкка чыккандар тарабынан өлтүрүлгөн укук коргоо органдарынын кызматкерлеринин саны 15ке жеткенин кабарлады.
Агенттиктин маалыматына караганда, коопсуздук кызматтарынын алты кызматкери Фарс провинциясында каза болуп, дагы 120 полиция кызматкери жаракат алган. Кум провинциясында, Tasnim билдиргендей, эки полиция кызматкери козголоңчулар тарабынан жасалган 40 бычак жаракатынан көз жумган. Ирандын түндүк-чыгышындагы Мешхед шаарында жети күч түзүмүнүн өкүлү демонстранттардын курмандыгы болгон.
АКШнын президенти Дональд Трамп ирандык бийликке нааразылык акцияларына катышкандар өлтүрүлгөн учурда өлкө аймагына «абдан катуу сокку» уруларын буга чейин эки жолу эскерткен.
Иранда нааразылык акциялары декабрдын аягында улуттук валютанын кескин арзандашынан жана баалардын катуу өсүшүнөн улам башталган. Он чакты шаарда өткөн акциялардын катышуучулары саясий түзүлүштү өзгөртүүнү жана шахтын мураскери — ханзаада Реза Пехлевинин бийликке келишин талап кылышууда. Тегерандын версиясы боюнча, нааразылык толкунун Израиль менен АКШ уюштурган.
