Чет элдиктердин кыймылсыз мүлк сатып алуусу Кыргызстандагы баага таасир этпейт
Чет өлкөлүктөрдүн турак жай сатып алышы Кыргызстандагы кыймылсыз мүлктүн баасына таасир этпейт. Бул тууралуу Мамлекеттик жер ресурстары агенттигинин башкы адиси Аман Кебеков «Биринчи радионун» эфиринде билдирди.
Анын айтымында, коомчулукта чет өлкөлүктөр катышкан бүтүмдөр турак жайдын баасын көтөрүп жиберет деген кооптонуулар айтылып келген. Бирок жүргүзүлгөн талдоо мындай бүтүмдөрдүн үлүшү өтө аз экенин жана жалпы көлөмдүн 1 пайызына да жетпей турганын көрсөткөн.
Аман Кебеков чет өлкөлүктөрдүн Кыргыз Республикасында жер тилкелерин сатып алууга укугу жок экенин эске салды. Ошол эле учурда мыйзамдар аларга батирлерди жана турак үйлөрдү сатып алууга мүмкүнчүлүк берет.
«Негизинен сөз Россиянын жарандары тууралуу болууда — алар, чынында, жарандыгын өзгөрткөн мурдагы мекендештер. Кытай жарандарынын кыймылсыз мүлк сатып алышы тууралуу да сөздөр болгон, бирок алардын саны да өтө аз», — деди ал.
