Казакстандык жигит Алматыдан Эверестке велосипед менен барды
35 жаштагы казакстандык Денис Желнин Алматыдан Эвересттин базалык лагерине велосипед менен барды. Миңдеген километр жана алты мамлекет, кар, жамгыр, тоо ашуулары жана кычкылтек жетишсиз бийиктиктерди басып өткөнүн Tengrinews.kz жазды.
Басылманын маалыматына караганда, Денис Павлодарда төрөлүп, Экибастузда чоңойгон, кийин кайра Павлодарда жашаган, ал эми сапарга чыгардан мурунку акыркы төрт жылды Алматыда өткөргөн.
Велосипед анын жашоосунда 11–12 жыл мурун пайда болуп, убакыт өткөн сайын басып өткөн аралык да узарып отурган.
Эверестке баруу идеясы кышында — олуттуу саякаттарсыз өткөн бир нече жылдан кийин пайда болгон.
«Жөн эле жөө жүрүш эмес, чындап эле эпикалык нерсе кааладым», — дейт Денис Желнинден.
Ал Казакстан, Россия, Кыргызстан жана Тажикстан боюнча ондогон маршруттарды карап чыккан, бирок алардын бири да өзгөчө сезим жараткан эмес. Ошондо Эверест тууралуу ой келген. Даярдыкка болжол менен алты ай кеткен.
Жол миңдеген чакырымга созулуп, алты өлкөнү камтыган:
Казакстан — старт;
Кыргызстан — өлкөнү толугу менен кесип өткөн;
Тажикстан — Тоолуу Бадахшан автоном облусундагы Памир трактынын эң бийик тоолуу бөлүгү;
Кытай — кыска аралык;
Пакистан — Гилгит-Балтистандагы Каракорум шоссесинин толук бөлүгү;
Индия жана Непал — маршруттун акыркы этабы.
Белгиленгендей, жолдун көп бөлүгүндө велосипедчи жалгыз жүрүп, өзүн ыңгайлуу сезген. Бирок сапардын аягында ал өзүнүн жеке чек арасы кайда экенин түшүнгөн.
«Башында жалгыз болуу ыңгайлуу эле, жолдун аягында болсо мен жалгыздыктагы өзүмдүн комфорттук чегиме жеттим. Эмоциялар аралаш: Эверестке жеткендеги суктануу жана максат орундалгандан кийинки жеңил боштук сезими», — деп белгиледи саякатчы.
