Тырмактардын сынышы жана дайыма чарчоонун себеби аныкталды
«Скандинавия саламаттык борборунун» терапевти Ольга Чистик эскерткендей, тырмактардын бат сынышы, теринин кургашы, манжалардын бат тоңушу жана туруктуу чарчоо көп учурда калкан безинин ишинин бузулушунан кабар берет. Бул көйгөйдүн көзгө дароо урунбаган белгилери тууралуу адис айтып берди.
Дарыгер белгилегендей, тырмактардын сынышы, уйкучулук жана энергиянын азайышы көбүнчө витаминдердин жетишсиздиги менен байланыштырылат. Бирок анын айтымында, мындай белгилер көп учурда гипотиреозду — калкан бези гормондорду жетишсиз бөлүп чыгарган абалды — көрсөтөт.
«Калкан безинин гормондору зат алмашууну, жүрөктүн ишин жана кан тамырлардын тонусун жөнгө салат. Алардын деңгээли төмөндөгөндө жүрөктөн чыккан кан агымы азаят, айрым четки кан тамырлар тарылып, кан негизги маанилүү органдарга багытталат. Ушундан улам кол-буттар жылуу бөлмөдө да тоңуп турат», — деп түшүндүрдү Чистик. Ушул эле себептен тырмактар азыраак азыктанат жана кычкылтек жетишпей, натыйжада морт болуп, кургап, үстүндө узунунан кеткен сызыктар пайда болот.
Гипотиреоздун башка жашыруун белгилерине дарыгер көңүлдү топтой албоо, башта туман болгон сыяктуу сезим, эмоционалдык шалакылык, чачтын сынышы жана ич катууга жакындыкты кошту. Бирок бул оорунун коркунучу — анын жай өнүгүшүндө: адам бара-бара өзүн начар сезүүгө көнүп, дарыгерге кайрылууну кечеңдетип коёт.
