Nipah вирусуна жол бербөө максатында Кыргызстанда санитардык-карантиндик көзөмөл күчөтүлдү
Өлкө аймагына Nipah вирусунун кирип кетишине жол бербөө максатында «Манас» эл аралык аэропортунда санитардык-карантиндик иш-чаралар жүргүзүлдү. Бул тууралуу Саламаттык сактоо министрлигинен кабарлады.
Жүргүзүлүп жаткан иш-чаралардын алкагында учурда бул вирустук оорунун кезектеги очогу катталган Индиядан келген жүргүнчүлөргө өзгөчө көңүл бурулууда.
Министрдин орун басары Рыспек Сыдыгалиев жумасына бир жолу аткарылуучу Бишкек – Дели – Бишкек эл аралык авиакаттамында санитардык-карантиндик көзөмөлдүн уюштурулушун текшерип, жугуштуу оорулардын белгилери бар жүргүнчүлөрдү өз убагында аныктоо иштерине баа берди.
Коомдук саламаттык сактоо башкармалыгынын башчысы Санжарбек Темирбеков жана Оорулардын алдын алуу жана мамлекеттик санитардык-эпидемиологиялык көзөмөл департаментинин директору Чолпон Шамсутдин кызматтардын даярдыгы жана зарыл санитардык-карантиндик чаралар толук камсыздалгандыгы тууралуу маалымат беришти.
Маалыматка караганда, 1-февралда Индиядан келген авиакаттам менен Кыргызстанга 158 жүргүнчү учуп келди. Учурда Республикалык карантиндик жана өзгөчө кооптуу инфекциялар борбору жана «Манас» аэропортунун санитардык-карантиндик пунктунун медицина кызматкерлери биргеликте күчөтүлгөн тартипте иш алып барышууда.
«Калктын санитардык-эпидемиологиялык коопсуздугун камсыз кылуу максатында эл аралык каттамдар менен келген бардык жүргүнчүлөрдүн дене табы милдеттүү текшерүүдөн өткөрүлөт. Дене табы 37,5°С жана андан жогору болгон учурларда жүргүнчүлөр дароо изоляцияланып, белгиленген тартипте тиешелүү медициналык жардам көрсөтүлөт», — деп айтылат маалыматта.
Белгиленгендей, бардык иш-чаралар колдонуудагы санитардык-карантиндик талаптарга ылайык жана кызыкдар мамлекеттик органдар менен тыгыз кызматташтыкта жүргүзүлүүдө. Учурда эпидемиологиялык кооптуу абал катталган жок, бардык келген жүргүнчүлөрдүн ден соолук абалы канааттандырарлык деп бааланууда.
