«Мен эч нерсеге өкүнбөйм». Линдси Вонн кулагандан кийин алгач ирет комментарий берди
2010-жылкы Олимпиада оюндарынын чемпиону, дүйнөнүн эки жолку чемпиону, америкалык тоо лыжачы Линдси Вонн Кортинедеги мелдеш маалында болгон окуядан кийин алгач ирет комментарий берди. Белгилүү 41 жаштагы спортчунун айтымында, жыйынтык көңүл жубатарлык болбосо да, ал олимпиадалык трассага чыккандыгына өкүнбөйт.
«Тилекке каршы, мен балтыр сөөгүмдү сындырып алдым. Азыр анын абалы туруктуу, бирок толук айыгышы үчүн бир нече операция талап кылынат. Кечээ күн мен күткөндөй аяктаган жок, катуу физикалык ооруну башымдан өткөрүп жатканыма карабастан, мен эч нерсеге өкүнбөйм. Старттык дарбазанын алдында туруу — мен эч качан унутпай турган укмуштуу сезим болду.
Ал жерде туруп, жеңишке жетүү мүмкүнчүлүгүм бар экенин билүү — өзү эле жеңиш болчу. Ошондой эле жарыштар тобокелдик экенин түшүнчүмүн. Алар ар дайым болгон жана ар дайым өтө кооптуу спорт түрү бойдон калат», — деп жазган спортчу операциядан бир нече саат өткөндөн кийин Instagram баракчасына.
Эске салсак, 8-февралда Вонн ылдам түшүү боюнча мелдеш учурунда кулап жаракат алган. Лыжачы трассадагы желекке илинип, абада айланып кеткендиктен кырсыкка кабылган.
