Түштөн кийинки убакта жеген таттуу жеңил тамактар деменциянын өнүгүү коркунучун жаратат
Түштөн кийинки убакта таттуу жеңил тамактарды көп жеш мээге зыян келтирип, деменциянын өнүгүү коркунучун жогорулатышы мүмкүн. Бул тууралуу медайым Киара Девитт Fox News менен болгон маегинде билдирди.
Девитт таттуу жеңил тамактар бат энергия берерин, бирок кандагы канттын деңгээлин кескин көтөрүп саларын түшүндүрдү. Анын айтымында, мындай өзгөрүүлөр мээге стресс жаратып, сезгенүү процесстерин күчөтүшү, нейрондордун ишин бузушу жана мээнин кан тамырларына кошумча жүк түшүрүшү мүмкүн. Узак мөөнөттүү келечекте бул деменциянын пайда болуу коркунучун жогорулатат.
Мунун алдын алуу үчүн Девитт курамында белок, клетчатка жана пайдалуу майлар бар ден соолукка пайдалуу жеңил тамактарды тандап алууну сунуштады.
Ал эң ылайыктуу варианттар катары жаңгактарды, йогуртту же жемиштерди атады. Ошол эле учурда ал таттууларды жана десерттерди рациондон толук алып салуунун кереги жок экенин белгиледи — аларды негизги тамактан кийин жесе болот, бирок анын ордуна эмес.
