Кол-буттун муздай берүүсү ден соолуктагы олуттуу көйгөйлөрдүн белгиси болушу мүмкүн
Дайыма үшүй берүү, кол-буттун муздап калышы ден соолуктагы олуттуу көйгөйлөрдүн белгиси болушу мүмкүн. Бул тууралуу токсиколог Михаил Кутушов билдирди. Айрыкча, ал кан айлануунун бузулушу, аз кандуулук жана калкан безинин ооруларынын коркунучу бар экенин белгилеген.
«Кан тамырлар тарыганда же кан кол-буттарга жетишсиз барганда, алар жетиштүү жылуулук албай калат. Бул атеросклероз, кан басымдын жогорулашы же башка кан тамыр оорулары менен байланыштуу болушу мүмкүн, — деди дарыгер. — Экинчи жагдай — калкан бези. Гипотиреоз, башкача айтканда калкан безинин гормондорунун жетишсиздиги, зат алмашууну жайлатат да, организм түз маанисинде муздай баштайт. Адамдар жылуу бөлмөдө да үшүп калышат, тери кургап, шишик пайда болуп, чарчоо күчөйт».
Кутушовдун айтымында, туруктуу үшүк басуунун дагы бир себеби — аз кандуулук, башкача айтканда кандагы темирдин төмөн деңгээли. Мындай учурда кычкылтек организмде начар ташылып, ткандар гипоксиядан жабыркай баштайт.
«Айрым учурда кол-буттун муздашы нерв системасынын көйгөйлөрү менен да байланыштуу болушу мүмкүн: диабеттик нейропатия, Рейно синдрому же перифериялык нервдердин жабыркашы. Мындай учурда абанын температурасы нормалдуу болсо да, кол-буттун манжалары муздап, агарып кетет, чымырап, жансыздануу же тырышуу байкалат. Албетте, бул белгилерге организмдин жалпы абалы да таасир этет: өнөкөт чарчоо, стресс, уйкунун жетишсиздиги, туура эмес тамактануу», — деп кошумчалады дарыгер.
