Жапаров: Мамлекеттин өнүгүүсүнө салым кошуп жаткан ишкерлерди дайны жок эле кысымга албагыла
Мамлекеттин өнүгүүсүнө салым кошуп жаткан ишкерлерди дайны жок эле кысымга албагыла. Кокус кандайдыр бир кысым-басымдын четин угуп калсам, капа болбогула. Мындай сөзүн президент Садыр Жапаров бүгүн Ала-Арча жаратылыш паркындагы асма жолдун ачылышында айтты.
«Ишкерлер ирденип алса салыктык төлөмдөр дагы көбөйүп, кошумча жумуш орундары түзүлөт. Мамлекетибизге, эли-журтубузга бардык жагынан пайда гана алып келет. Ошол эле учурда мамлекет ишеним артып, тиешелүү шарттарды түзүп берип жатканда ишкерлер дагы кыянаттык кылбайт, салыктарын жаап-жашырбай ак иштейт деп үмүт кылам», — дейт өлкө башчысы.
Белгилей кетсек, мамлекет башчысы Ала-Арчада курулган, узундугу бир чакырым болгон жаңы асма жол боюнча дагы маалымат берген. Анын айтымында, мындан ары саатына миңге жакын адам тоо чокусуна жете алат.
Президент акыркы жылдары парктагы инфратүзүм толук жаңыланганын айтып, коттедждер курулуп, родельбан жана беш жылдыздуу мейманкана салынарын кошумчалады. Өлкө башчысы белгилегендей, санариптештирүүнүн жана тартиптин негизинде Ала-Арча жаратылыш паркынын кирешеси кыйла өскөн. Эгер 2020-жылы парк 29 миллион сом киреше тапса, 2025-жылы бул көрсөткүч 262 миллион сомдон ашкан.
Жапаров өлкөнүн туристтик потенциалын толук пайдалануу башкы максат экенин белгиледи. Ички жана тышкы инвесторлор үчүн шарттар түзүлөрүн, негизсиз текшерүүлөргө мораторий киргизилгенин да эске салды.
