21 күндүн ичинде ден соолукту жакшыртып арыктоого жардам берчү үч жөнөкөй адат
Дарыгер Майкл Бреус 21 күндүн ичинде ден соолукту жакшыртууга жардам бере турган үч жөнөкөй адат тууралуу айтты. Бул күчтүү айкалышты ал 20minutos басылмасына берген маегинде бөлүшкөн.
Анын айтымында, сапаттуу уйку, жетиштүү көлөмдө суу ичүү жана туура дем алуу арыктоого көмөктөшөт, сезгенүүнү азайтат, иммундук системанын ишин жакшыртат, энергия деңгээлин жогорулатат жана башка көптөгөн пайдалуу натыйжаларды берет.
Бреус ден соолукту чыңдоо дайыма эле кымбат же татаал болбой турганын белгиледи. Анын сөзүнө караганда, өзүн жакшы сезүү үчүн кээде жашоого аз гана өзгөртүү киргизүү жетиштүү.
Ошондой эле дарыгер кантип туура дем алуу керектигин өзүнчө түшүндүрдү. Ал дем алууда курсак көңдөйүн иштетип, дем чыгарууну дем алуудан узагыраак кылуу зарыл экенин айтты.
«Дем алууга караганда узагыраак дем чыгаруу менен коштолгон терең диафрагмалык (курсак аркылуу) дем алуу денени жана акылды тынчтандырып, эс алууга жардам берет. Эгер стресс гормону — кортизолдун деңгээли жогору бойдон калса, аны 4-7-8 диафрагмалык дем алуу ыкмасы аркылуу жөнгө салып, кортизолдун өзгөрүү тенденциясын тескери нукка бурууга болот», — деп кошумчалады ал.
