Кара чай гипертониянын пайда болуу коркунучун 10 пайызга азайтат
Кара чай систоликалык кан басымды төмөндөтүшү мүмкүн. Бул тууралуу дарыгер Джессика Брэнтли-Лопес Eating Well басылмасына берген маегинде айтып, анын пайдасы эмнеге байланыштуу экенин түшүндүрдү.
Анын айтымында, систоликалык басым — бул артериялык кан басымдын эң жогорку көрсөткүчү. Аны нормалдуу деңгээлде кармап туруу жүрөк оорулары жана инсульт коркунучун азайтууда маанилүү роль ойнойт. Дарыгер түшүндүргөндөй, чайдын курамындагы полифенолдор кан тамырлардын иштешин жакшыртат.
Бул пайдалуу заттар көптөгөн жемиштерде, жашылчаларда, толук дан азыктарында жана жаңгактарда да бар.
Мындан тышкары, кара чайдагы полифенолдор кадимки холестериндин да, зыяндуу холестериндин да деңгээлин төмөндөтүп, атеросклероздун пайда болушунан коргоого жардам берет. Дарыгердин айтымында, курамында кан басымды көтөрө турган кофеин болгонуна карабастан, кара чайды ичүү гипертониянын пайда болуу коркунучун 10 пайызга азайтат.
Гипертония жана инсульттан сактануу үчүн Брэнтли-Лопес кара чайды кошумчасыз — кантсыз жана башка кошулмаларсыз ичүүнү сунуштады.
