Кыргызстандын көк бөрү боюнча улуттук курама командасы Казакстанда өтө турган чемпионатка катышпайт
Кыргызстандын көк бөрү боюнча улуттук курама командасы 15–21-мартта Казакстандын Түркстан шаарында өтө турган көкпар боюнча экинчи дүйнө чемпионатына катышпайт. Бул тууралуу Көк бөрү федерациясынын басма сөз катчысы Самат Жумакадыров билдирди.
Анын айтымында, баш тартуунун негизги себеби — уюштуруучулар тарабынан чакыруу өтө кеч жөнөтүлгөнү. Жумакадыров белгилегендей, мындай деңгээлдеги турнирлерге чакыруу кеминде үч ай мурда, ал эми мүмкүн болсо жарым жыл мурда жөнөтүлүшү керек.
«Бул бойкот эмес. Бул жөн гана мүмкүн эмес. Аттарды тандап алуу, 12 оюнчудан турган курамды түзүү, машыктыруучуларды дайындоо жана толук кандуу даярдык көрүү үчүн убакыт керек», — деди Жумакадыров.
Мындан тышкары, ушул эле күндөрү Кыргызстанда масштабдуу республикалык «Нооруз-2026» турнири өтөт. Анын алкагында күзүндө Кыргызстанда өтө турган Дүйнөлүк көчмөндөр оюндары үчүн улуттук курамага тандоо башталат.
Федерациядан билдиришкендей, мындай жооптуу мезгилде командалар мыкты оюнчуларын да, мыкты күлүк аттарын да коңшу өлкөгө жөнөтө албайт.
Көкпар боюнча экинчи дүйнө чемпионаты Казакстандын Түркстан шаарында өтүп, ага 10 өлкөнүн спортчулары катышат. Турнирде улуттук курама командалар гана күч сынашат, ал эми жалпы байге фонду 30 миллион теңгені түзөт.
