2026-жылы бизнести колдоого 1,5 миллиард сомго чейин каражат бөлүнөт
Кыргызстанда 2030-жылга чейин кичи жана орто бизнести өнүктүрүү программасынын долбоору даярдалды. Бул тууралуу брифингде Экономика жана коммерция министрлигинин биринчи орун басары Чоро Сейитов билдирди.
Анын айтымында, жаңы программа мурдагы программалардан айырмаланып, ишкерлерди активдүү колдоо механизмдерине басым жасайт. Анда каржылык жана каржылык эмес колдоо чаралары каралган. Алардын ичинде:
-ишкерлерди окутуу;
кредиттик продуктыларды иштеп чыгуу;
-стартаптарды колдоо;
бизнес-пландоого жардам берүү;
-бизнес-инкубаторлорду өнүктүрүү.
Өкмөт ошондой эле кичи жана орто бизнести каржылоонун көлөмүн олуттуу көбөйтүүнү пландап жатат. Эгер өткөн жылы бул багытка болжол менен 300 миллион сом бөлүнсө, 2026-жылы 1,5 миллиард сомго чейин каражат бөлүү каралууда. Каражаттар Ишкерликти өнүктүрүү фонду аркылуу берилет.
Бул каражаттар айыл чарбасынан башка бардык тармактагы чакан жана орто бизнес өкүлдөрү үчүн жеткиликтүү болот. Айыл чарбасы үчүн өзүнчө мамлекеттик программалар иштейт.
Программага ылайык ишкерлер:
-жылына 6–12 пайыздык жеңилдетилген кредиттерди ала алышат;
-пайыздык чендин бир бөлүгүн мамлекет компенсациялайт.
Ошондой эле ишкерлердин каржылоого жетүүсүн кеңейтүү үчүн Кепилдик фонд аркылуу кредиттерге кепилдик берүү механизми колдонулат. Бул күрөө жетишсиз болгон учурда жардам берет.
Мындан тышкары, өкмөт креативдүү экономика жана IT тармагын өнүктүрүүнү улантат. Бул багытта Digital Nomad программасынын алкагында иштер жүргүзүлүүдө.
Ишкерлерди колдоо үчүн атайын консорциум түзүлгөн. Ал төмөнкү инструменттерди бириктирет:
-эки тараптуу фонддор;
-региондорду өнүктүрүү фонддору;
-акселерациялык программалар;
-ишкерлерди колдоо борборлору.
Бирдиктүү платформа бардык колдоо институттарынын ишин координациялоого жардам берет.
Чоро Сейитов белгилегендей, чакан жана орто бизнести өнүктүрүү экспорттун өсүшүнө да салым кошушу керек. Бул максатта өлкөдө «Кыргызстанда жасалган» продукциясын чет өлкөгө илгерилетүү программасы иштеп жатат. Ошондой эле ишкерлерге Кыргыз Экспорт борбору жардам берип, компаниялардын эл аралык көргөзмөлөргө катышуусун жана окутуу программаларын уюштурат.
