23-апрелде Кыргызстанда жалпы элдик улуу тиленүү өтөт(видео)
ЖАЛПЫ ЭЛДИК УЛУУ ТИЛЕК
Кадырлуу кыргыз журту!
Жалпы элибиз бир күндө, бир учур-саатта үй-үйлөрүбүздөн эле тиленип, ниетибизди бириктирели!
Азыркы мезгилде ар бирибиздин көкүрөгүбүздө: «Апаат токтосун, жаман илдеттин жолу буулсун, кырдаалыбыз жеңилинен болуп, жакшылыгыбыз тезинен орносун» деген ой-тилек жашап жатат. Мына ошол мүдөөбүздүн КУБАТЫН, ДЕҢГЭЭЛИН, ЖАРЫГЫН баарыбыздын бириккен тилегибиз менен күчтөйлү!
«Тилеги бирдин — билеги бир,
Биримдүү элдин — жакшысы миң!» — дейт.
Мындан аркы таалайыбыздын да кең болушуна ишенимди бекем артып, Жалпы Элдик Улуу Тилекте бүтүндөй жер жүзүнүн бүтүндүгүн, адамзаттын оңолуусун, мекенибиздин өзгөрүп-өсүүсүн, элибиздин ынтымак-ырыскысын Жараткандан сурайлы. Элибизге, эл ичинде ар бирибиз өзүбүзгө, жакындарыбызга ыйман-ынсап, пейил-ниет, ырыскы-береке тилейли!
Убактысы 23-апрель, түшкү саат 12.00дө болот.
Уюштуруучу топ
