Кара-Суу районунда улам той өткөргөн тойкананын ээсине кылмыш иши козголду

Ош облусунун  Кара-Суу районундагы «Баястан» тойканасынын ээсине сотко чейинки өндүрүш иши ачылды. Бул тууралуу Ош облустук Ички иштер башкармалыгынын маалымат катчысы Жеңиш Аширбаев билдирди.

Анын айтымында, 7-июлда Фуркат айылында жайгашкан тойкананын чайканасында тушоо кесүү тою өткөн. Аталган факт Кылмыш жана жоруктардын бирдиктүү реестрине катталып, Жоруктар жөнүндө кодекстин 127-беренесинин 1-бөлүмү («Чектөө иш-чараларынын талаптарын бузуу» ) боюнча ресторан ээсине сотко чейинки өндүрүш иши ачылган. Ал 40 жаштагы Жалал-Абад облусунун тургуну.

«Аталган тойкана ээсине буга чейин эки ирет эскертүү берилип айып пул салынган жана ресторан 15 күнгө жабылган. Ага карабай ресторандын чайканасында тушоо кесүү тою өткөн», — деп айтылат маалыматта.

Өзгөчө абал учурунда Ош облусунун аймагында карантиндин талаптарын бузуу фактысы боюнча 37 иш сотко чейинки өндүрүшкө алынганы кошумчаланды.