Балбак Түлөбаев жаңы конуштагы жерлерди мыйзамдаштырарын айтты
Мэрдин милдетин аткаруучу Балбак Түлөбаев мөөнөтү аяктагыча жаңы конуштардагы жерлерди мыйзамдаштырып кетерин онлайн-брифингде билдирди.
Түлөбаев апрелге чейин гана иштей турганын айтып, бул аралыкта калаада чоң өзгөртүүлөрдү жасоого жетишпей каларын белгиледи.
«Мен бул кызматта апрель-майга чейин эле отурам. Ага чейин жасап, бүтүрүп кетчү бир топ тапшырмаларым бар. Алардын бири — жаңы конуштардагы жерлерди мыйзамдаштыруу. Мындан сырткары, автобус көйгөйүн чечип, структуралык өзгөртүүлөрдү жасайм. Жерлерди инвентаризация кылып да жетишишибиз керек. Эң башкы тапшырма — элди кыштан, коронавирустан аман-эсен алып чыгуу», — деди калаа башчынын милдетин аткаруучу.
Түлөбаев Бишкекти ТЭЦ-2 районун көздөй чоюу маселесин карап чыгуу боюнча премьер-министрдин милдетин аткаруучу Артем Новиков тапшырма бергенин айтып, бул тема дагы талкуулана турганын белгиледи.
