Кыргызстанда алгачкы жолу туристтердин коопсуздугу камсыздандырылды
Кыргызстанда алгачкы жолу мамлекеттик деңгээлде туристтердин коопсуздугун камсыздоо максатында ири суммадагы камсыздандыруу ишке ашырылды. Бул тууралуу Мамлекеттик камсыздандыруу уюмунан кабарлашты.
Маалым болгондой, «Нарын – Кыш керемети» пресс-турунун алкагында чет өлкөдөн жана өлкө ичинен келген 38 катышуучу үч күндүк мөөнөткө жалпысынан 3 млн 800 миң сомго камсыздандырылды.
Бул демилге Нарын облусунун кооз жаратылышын, бай тарыхый-маданий мурастарын жана туристтик мүмкүнчүлүктөрүн кеңири таанытуу максатында уюштурулган. Иш-чарага Кытай, Өзбекстан, Казакстандан келген журналисттер, блогерлер жана туризм тармагынын эксперттери катышууда.
«Нарын – Кыш керемети» пресс-турунун негизги өнөктөштөрүнүн бири Мамлекеттик камсыздандыруу уюму болду. Иш-чарага уюмдун төрагасы Элдияр Калдарбеков катышып, чет өлкөдөн келген туристтер жана журналисттер менен жолугушуп, Нарын облусунун туристтик потенциалы тууралуу маалымат берди.
