Ысык аба ырайында жүрөккө зыян келтирбөө үчүн жөнөкөй эрежелерди сактоо зарыл
Валентина Гавриляк ысык аба ырайында сейилдөө учурунда жүрөккө жана кан тамырларга зыян келтирбөө үчүн жөнөкөй эрежелерди сактоо керектигин билдирди.
Дарыгер күн эң катуу тийген саат 12:00дөн 16:00гө чейин сыртка чыкпоону жана түз күн нурунда 15–20 мүнөттөн ашык жүрбөөнү сунуштады. Ошондой эле ал ачык түстөгү, кенен жана табигый кездемеден тигилген кийим кийип, сөзсүз баш кийим тагынуу керектигин белгиледи. Бул ысып кетүүдөн улам кан басымдын кескин түшүп кетишинен сактап, жүрөккө болгон күчтү азайтат.
Кардиологдун айтымында, эң жакшы суусундук — бөлмө температурасындагы же бир аз салкын суу. Өтө муздак суусундуктар кан тамырлардын түйүлүшүнө жана тамак ооруларына алып келиши мүмкүн.
«Ысыкта күнүнө 3–3,5 литрге чейин суу ичсе болот, ал эми катуу физикалык жүк болгондо андан да көп ичүү зарыл. Ысык аба ырайында ар бир килограмм салмакка кеминде 40 миллилитр суу туура келет. Алкоголь жана таттуу газдалган суусундуктардан баш тарткан оң, анткени алар жүрөккө зыян келтирет. Ошондой эле майлуу жана өтө калориялуу тамактарды азайтып, жашылча-жемиштерди көбүрөөк жеш керек», — деди дарыгер.
Мындан тышкары, ысыктан кийин дароо кондиционердин муздак абасына же муздак душка кирүүгө болбойт. Бул кан тамырлардын түйүлүшүнө жана жүрөккө күч келтириши мүмкүн.
Дарыгер салкын жайга кирерден мурда көлөкөдө бир аз эс алып турууну сунуштады. Кондиционер колдонууда бөлмө менен сырттагы абанын температурасынын айырмасы 5–7 градустан ашпашы керек.
Ошондой эле ал тамекиден баш тартууга чакырды, анткени никотин жүрөктүн кан тамырларын тарытат жана ысыкта жүрөккө ансыз да оор болот.
Валентина Гавриляк өзгөчө жүрөк оорусу, кан басымы жогору адамдар, инфаркт же инсульт өткөргөндөр, кант диабети менен ооругандар, улгайган адамдар жана ашыкча салмагы барлар ысыкта өтө этият болушу керектигин кошумчалады.
