Экзамен учурунда өспүрүмдөрдүн башы эмнеге көп ооруйт?
Экзамен маалында өспүрүмдөр арасында баш оору эң көп кездешкен даттануулардын бири болуп саналат. Бул тууралуу дарыгер-невролог Галина Чудинская билдирди.
Адистин айтымында, баш оорунун негизги себептери — эмоционалдык стресс, уйкунун жетишсиздиги, туура эмес тамактануу жана сууну аз ичүү. Өспүрүмдөр түнгө чейин даярданып, тамактанууну өткөрүп жибергенде жана аз кыймылдаганда мээ менен булчуңдар ашыкча жүктөмдө иштеп, баштагы кан тамырлар жана булчуңдар чыңалып калат. Натыйжада баш ооруй баштайт.
Мындан тышкары, смартфон жана компьютерди узак убакыт колдонуу да терс таасирин тийгизет. Экранды көп караганда көз булчуңдары чарчап, баш алдыга эңкейген абалда узак отуруу моюн жана ийин булчуңдарына күч келтирет. Бул кан айланууну начарлатып, булчуңдардын түйүлүүсүн күчөтүп, баш ооруну пайда кылышы мүмкүн.
Дарыгер ошондой эле кофе жана энергетикалык суусундуктар абалды ого бетер оорлотушу мүмкүн экенин белгиледи. Кофеин убактылуу сергиткени менен тынчсызданууну күчөтүп, уйкунун бузулушуна, организмдин суусузданышына жана баш оорунун күчөшүнө алып келет.
Адистин айтымында, мындай учурда жетиштүү уктоо, үзгүлтүксүз тамактануу, көбүрөөк суу ичүү жана окуу учурунда тыныгууларды жасап туруу баш оорунун алдын алууга жардам берет.
