Музейге, театрга, киного жана концерттерге баруу карылыкты жайлатышы мүмкүн
50 жаштан ашкан адамдардын музейге, театрга, кинотеатрга жана концерттерге үзгүлтүксүз барып турушу организмдин физиологиялык жактан жайыраак картаюусу менен байланыштуу болушу мүмкүн. Бул тууралуу ScienceDaily басылмасы жазды.
Токио илим институтунун окумуштуулары Англияда жүргүзүлгөн карылык боюнча узак мөөнөттүү изилдөөгө катышкан 1899 адамдын маалыматтарын талдашкан. Изилдөөнүн башталышында алардын бардыгы 50 жаштан жогору болгон.
Катышуучулардын ден соолугу 2004 жана 2009-жылдары текшерилген. Адистер кан басымын, өпкөнүн иштешин, гемоглобин менен холестериндин деңгээлин, дене салмагынын индексин, колдун кысуу күчүн, басуу ылдамдыгын жана башка көрсөткүчтөрдү өлчөшкөн. Ушул маалыматтардын негизинде ар бир катышуучунун физиологиялык жашы эсептелген.
Бул көрсөткүч организмдин канчалык жакшы иштеп жатканын көрсөтүп, адамдын паспорттогу жашынан айырмаланышы мүмкүн.
Изилдөөгө катышкандар кинотеатрга, музейге, көркөм галереяга, театрга, концертке жана операга канчалык көп барышарын айтып беришкен. Алардын маданий активдүүлүгү 0дөн 15 баллга чейинки шкала боюнча бааланган.
Жыйынтыгында маданий иш-чараларга жок дегенде бир нече айда бир жолу барып турган адамдардын орточо физиологиялык жашы 66,9 жаш, ал эми сейрек баргандардын физиологиялык жашы 69,9 жаш экени аныкталган.
Окумуштуулар белгилегендей, маданий активдүүлүктөгү ар бир кошумча балл физиологиялык жаштын орточо 31 күнгө жашыраак болушу менен байланыштуу болгон. Бул байланыш киреше, жумуш, өнөкөт оорулар жана башка факторлор эске алынгандан кийин да сакталып калган.
Изилдөөнүн авторлору маданий эс алуу социалдык байланыштарды чыңдап, психикалык ден соолукту жакшыртып, сергек жашоо образын карманууга түрткү бериши мүмкүн деп эсептешет. Алардын айтымында, мындай таасир үзгүлтүксүз дене тарбия менен машыгуунун оң таасирине салыштырмалуу болгон.
