Аутизм менен ооруган кыздын колун сындырган психологго сот өкүмү чыкты
Бишкектин Ленин райондук соту аутизм диагнозу бар өспүрүм кызды сабак учурунда майып кылган жеке психологдун иши боюнча өкүм чыгарды. Айыпталуучу жалпы режимдеги колонияга алты жылга эркинен ажыратылды. Бул маалыматты «Балдар укуктарын коргоо лигасынын» жетекчиси Назгүл Турдубекова социалдык тармактагы баракчасында тастыктады. Анын айтымында, эркек киши сот залынан дароо камакка алынган.
Укук коргоочуларга бул иш боюнча алгач Наристе Нурланованын апасы Чынара Жунусова кайрылган. Ал кыз узак убакыт бою окуу процессинде күч колдонууга жана болбогон себептер менен оорутма ыкмаларга туш болуп келгенин айткан. Мындан тышкары, 2024-жылдын 23-декабрында жеке сабак маалында психолог Наристенин колун сындырып жиберген.
«Беш операция, токтобогон оору, эми болсо — өнөкөт остеомиелит. Наристе айлап оор дарылоодон өттү. Ар бир процедура ага өтө оор тийди. Аутизм диагнозун эске алганда, бул ага эки эсе сокку болду. Ал адамдардан жана ага жакындагандардан коркуп калды. Азыр да өзүнө тынчтык табууга аракет кылып жүрөт», — деп эскерди Жунусова.
Апасы бул окуя тууралуу маалыматты социалдык тармактарга да чыгарып, коомчулуктан жана соттон адилет чечим күтөөрүн билдирген.
«Бул окуя чоң коомдук резонанс жаратты. Мүмкүнчүлүгү чектелген балдардын коопсуздугу, алар менен иштеген адистердин компетенттүүлүгү жана жоопкерчилиги боюнча суроолор кайрадан талкуунун борборуна чыкты», — деди Турдубекова.
