Чет өлкөлүктөр Кыргызстандын экологиялык жактан таза айыл чарба азык-түлүктөрүн сатып алууга кызыкдар
Айыл чарба продукциясын экспортко чыгарууга шарт түзүү — Өкмөттүн артыкчылыктуу багыты. Бул тууралуу Кыргыз Республикасынын Премьер-министри Кубатбек Боронов Ысык-Көл облусуна жасаган сапарынын алкагында Жети-Өгүз районундагы күзгү оруп-жыйноонун жүрүшү менен таанышкан учурда билдирди.
«Чет өлкөлүктөр Кыргызстандын экологиялык жактан таза айыл чарба азык-түлүктөрүн сатып алууга кызыкдар. Экспортко чыгарууга шарт түзүү үчүн заманбап лабораториялар ачылууда. Ошондуктан продукцияны жетиштүү көлөмдө өндүрүүгө көңүл буруу керек», — деди Кубатбек Боронов.
Премьер-министр Кыргызстан Бүткүл дүйнөлүк соода уюмуна жана ЕАЭБге мүчө, мындан тышкары ВСП+ макамын алганын эске салып, бул мүмкүнчүлүктөрдү натыйжалуу пайдалануу үчүн өндүрүү технологияларын жакшыртуу зарылдыгын кошумчалады.
Муну менен катар Премьер-министр Жети-Өгүз районундагы фермерлер багып жаткан асыл тукум мал чарбачылыгын көрдү.
Өкмөт башчы Айыл чарба, тамак-аш өнөр жайы жана мелиорация министрлигине дыйкан-фермерлер менен тыгыз иш алып баруу боюнча бир катар тапшырмаларды берди.
