Таласта компьютер жана 5 килограмм эт уурдаган шектүү кармалды
Талас ОИИБдин кайгуул күзөт кызматынын кызматкерлери кылмыштын изин суутпай ачышты. Бул тууралуу Талас ОИИБден билдиришти.
Талас районунун Кум-Арык айылынын тургуну 1988- жылы туулган жаран арыз менен кайрылган. Анда 4-июндан 5-июнга караган түнү белгисиз адам үйдүн терезесин сындырып кирип, бөлмөдөгү 1 компьютер жана 5 килограмм этин уурдап кеткен.
Аталган факты боюнча Талас РИИБдин маалымат электрондук эсепке алуу журналында катталып, Кылмыш жаза кодексинин 205-беренесине ылайык кылмыш иши козголгон. Аталган кылмыш иши боюнча Талас ОИИБдин кайгуул күзөт кызматынын кызматкерлеринин ыкчам иш алып баруунун натыйжасында Бакай-Ата районунун Үч-Эмчек айлынын тургуну 1996-жылы туулган жаран шектүү катары кармалган. Талас ОИИБдин убактылуу кармоочу жайына киргизилген. Азыркы учурда тергөө иштери жүрүп жатат.
