«Манас» эл аралык аэропортунда инфекциялык көзөмөл киргизилди
«Манас» эл аралык аэропортунда катуу инфекциялык көзөмөл киргизилди. Дененин температурасын өлчөөчү атайын жабдуулар жүргүнчүлөрдү реалдуу убакыт режиминде текшерет.
«Кыргызстандын аэропорттору» ААКнын басма сөз кызматы билдиргендей, бул чара инфекциялык оорулардын, анын ичинде COVID-19 жана Индияда аныкталган Nipah вирусунун жайылышын алдын алуу максатында киргизилди.
Алардын маалыматына караганда, бул жабдуулар өлкөнүн башкы аба майданына 2021-жылы эле алып келинген, бирок эпидемиологиялык коркунучтар шартында бүгүнкү күндө да актуалдуу бойдон калууда.
«Эгер жүргүнчүнүн дене табы 37 градустан жогору аныкталса, көзөмөл зонасындагы кызматкерлер Карантиндик жана өзгөчө кооптуу инфекциялар борбору менен байланышат. Андан кийин мындан аркы аракеттер боюнча чечим кабыл алынат», — деп билдиришти басма сөз кызматынан.
Жүргүнчү тиешелүү борборго жеткирилип, ал жерден керектүү анализдер алынып, диагноз коюлат. Эгер грипп же суук тийүү сыяктуу оору аныкталса, адам амбулатордук дарылануу үчүн үйүнө жөнөтүлөт, ал эми кооптуу вирус табылган учурда — борбордун нускамасына ылайык чаралар көрүлөт.
Белгилей кетсек, Кыргыз Республикасы Индиядан Nipah вирусуна байланыштуу эт азыктарын алып келүүгө убактылуу чектөө киргизген.
