WhatsApp’та көптөн күткөн жаңы функция ишке кирет
WhatsApp колдонуучуларга телефон номерин жашырып, никнейм (колдонуучу аты) аркылуу кат алышууга мүмкүнчүлүк берген жаңы функцияны ишке киргизет.
Бул функция жакынкы айларда дүйнө жүзү боюнча этап-этабы менен жеткиликтүү болот. Июль айынан тарта колдонуучулар өздөрүнө уникалдуу никнеймди алдын ала брондоп алышса болот. Бирок бул милдеттүү эмес.
Колдонуучу өзүнүн никнеймин каалаган убакта өзгөртө же толугу менен өчүрө алат. Жаңы функция толук иштей баштагандан кийин жеке кат алышууларда телефон номери көрүнбөйт. Маектештерге сиздин никнеймиңизди билүү жетиштүү болот.
Ошол эле учурда аккаунт ачуу үчүн телефон номери мурдагыдай эле талап кылынат. Колдонуучулар каалабаган байланыштарды бөгөттөп же аларга даттануу жөнөтө алышат.
Компаниянын маалыматына ылайык, бул жаңылык колдонуучулардын жеке маалыматтарынын купуялуулугун күчөтүүгө багытталган. Элис Ньютон-Рекс белгилегендей, көптөгөн адамдар, айрыкча чоң топтук чаттарда же жакшы тааныбаган адамдар менен байланышканда, өздөрүнүн телефон номерин бөлүшүүнү каалашпайт.
