УКМК: Ош шаарында автотранспорт ишканасынын аймагы мамлекетке кайтарылды — ВИДЕО
УКМК Ош шаарындагы №1 жүргүнчү ташуу автотранспорт ишканасынын аймагын мамлекеттин балансына кайтарып берди.
Бул тууралуу УКМКнын маалымат кызматы билдирди.
КР УКМК мыйзамсыз менчиктештирилген мамлекеттик жана муниципалдык мүлктү аныктоо жана кайтарып алуу боюнча системалуу иш-аракеттеринин алкагында Ош шаардык жүргүнчүлөрдү ташуу автотранспорт ишканасынын мыйзамсыз менчиктештирилиши аныкталды.
Тактап айтканда, 2000-жылдардын башында ишкананын мурдагы директору аталган жердин аймагын мыйзамсыз менчиктештирип алган, андан кийин ал жерди бир нече бөлүккө бөлүп, аны өзүнө жакын адамдардын атына каттаткан.
Тергөө учурунда №1 жүргүнчүлөрдү ташуу автотранспорт ишканасынын мурдагы директору аталган мүлккө болгон менчиги мыйзамсыз экенин түшүнүп, административдик жана чарбалык имараттары бар 1,39 гектар жер тилкесин өз ыктыяры менен мамлекетке өткөрүп берди.
