Жарлыкка кол коюлду. 1-апрелден тарта бардык бюджеттик кызматкерлердин маянасы көтөрүлөт
Кыргыз Республикасынын президенти Садыр Жапаров бюджеттик тармактагы кызматкерлердин эмгек акы шарттарын жакшыртуу жөнүндө Жарлыкка кол койду.
Документке ылайык, 1-апрелден тартып президенттик компенсациялык төлөм киргизилет. Билим берүү, саламаттык сактоо, маданият, социалдык коргоо жана башка тармактардын кызматкерлери үчүн ал бир ставкасына 15 миң сомго чейин түзөт. Ал эми техникалык жана кенже тейлөөчү персонал, ошондой эле күч түзүмдөрүнүн жарандык кызматкерлери үчүн 5 миң сом өлчөмүндө төлөм каралган.
Мындан тышкары, 1-сентябрдан тартып айрым мамлекеттик кызматкерлер үчүн кызматтык маянага кошумча үстөктөр көбөйтүлөт — иштин татаалдыгына, сапатына жана жыйынтыгына жараша 50 пайызга чейин.
Айрым мамлекеттик органдардын кызматкерлерине (айрым түзүмдөрдү кошпогондо) кошумча 15 миң сом өлчөмүндө компенсация белгиленет.
Министрлер кабинетине жарлыкты ишке ашыруу үчүн зарыл чараларды көрүү жана 2026–2028-жылдарга республикалык бюджетке тиешелүү өзгөртүүлөрдү киргизүү тапшырылды.
Документтин аткарылышын көзөмөлдөө президенттин администрациясына жүктөлдү.
