Россия бензин менен керосинди экспорттоого тыюу салды
Владимир Путин Россиянын ички рыногун күйүүчү май менен камсыздоо маселеси боюнча жыйын өткөрдү. Бул тууралуу Кремлдин басма сөз кызматы билдирди.
Жыйындын жыйынтыгында бензин менен авиациялык керосинди экспорттоого толук тыюу салынды. Ошондой эле дизелдик күйүүчү майдын экспортун да толугу менен токтотуу мүмкүнчүлүгү каралууда.
Путиндин айтымында, өлкөдөгү ири мунай иштетүүчү заводдор максималдуу кубаттуулукта иштеп жатат. Мындан тышкары, орто жана чакан ишканалардын мүмкүнчүлүктөрү да пайдаланылып, учурдагы оңдоо иштери кыскартылып, пландуу оңдоолор кийинки мөөнөткө жылдырылган.
Анын белгилешинче, июль айында негизги күйүүчү май түрлөрүнүн өндүрүшү июнь айындагы көрсөткүчтөрдөн ашат деп күтүлүүдө.
Президент ошондой эле мурда топтолгон күйүүчү май запастары ички рынокко чыгарылганын айтты. Учурда бензиндин запасы 1,7 миллион тоннаны түзүп, бул 2025-жылдын ушул мезгилине салыштырмалуу болгону 4 пайызга аз.
Ошол эле учурда Путин айдоочулар жана бизнес үчүн көйгөйлөр дагы эле сакталып жатканын моюнга алды. Анын айтымында, май куюучу жайларда кезектер уланып, керектүү үлгүдөгү бензин бардык жерде жеткиликтүү эмес.
Президент айыл чарба өндүрүүчүлөрүн күйүүчү май менен өз убагында камсыздоого өзгөчө көңүл буруп, агроөнөр жай комплексине сезондук жеткирүү графиги сөзсүз аткарылышы керектигин белгиледи.
Анын айтымында, бул түздөн-түз түшүмдүн көлөмүнө таасир этет.
Жыйындын соңунда Путин күйүүчү май рыногун турукташтыруу, сунуш көлөмүн көбөйтүү жана экономикалык жактан негиздүү бааларды сактоо боюнча чараларды көрүүнү тапшырды. Бул багыттагы кырдаалды көзөмөлдөө үчүн өкмөт атайын штаб түздү.
