Темир Сариев: Жетим-Тоонун кирешелүүлүгүн азырынча баалоого эрте
Мурдагы премьер-министр Темир Сариев Жетим-Тоо кенин иштетүүнүн кирешелүүлүгүн толук техникалык-экономикалык негиздемесиз баалоо эрте экенин билдирди. Ал бул тууралуу Теңгиз Бөлтүрүктүн кенди өздөштүрүүнүн келечеги жана долбоордун болжолдуу баасы тууралуу айткандарына жооп берип жатып айтты.
Анын айтымында, 2021-жылы президент Садыр Жапаровдун тапшырмасы менен геология, тоо-кен иши, инженерия жана каржы тармагындагы ата мекендик адистерден турган жумушчу топ түзүлгөн. Долбоорду мамлекетке толук таандык компания аркылуу ишке ашыруу пландалган.
Адистер 1983-жылдагы геологиялык чалгындоо материалдарын жана Кытай тараптын 2008–2009-жылдары жүргүзгөн изилдөөлөрүн талдап чыгышкан.
Темир Сариев белгилегендей, даярдалган эсептөөлөр алдын ала мүнөздө болгон. Теңгиз Бөлтүрүк айткан 20 миллион доллар инвестиция тууралуу сумма жумушчу топтун документтеринде каралган эмес.
Ал негизги көйгөй катары кенди байытуунун татаалдыгын атады. Изилдөөлөргө ылайык, Жетим-Тоодогу гематит жана гематит-магнетит кендеринин басымдуу бөлүгү байытууга кыйын болуп саналат. Ал эми кайра иштетүүгө эң ылайыктуу магнетит кенинин үлүшү болжол менен 19 пайызды түзөт.
Жумушчу топтун концепциясына ылайык, кенди этап-этабы менен өздөштүрүү сунушталган. Алгач темир рудасынын концентратын өндүрүп, аны, анын ичинде Кытайга сатуу пландалган. Андан түшкөн каражатты металлургиялык комбинат курууга жумшоо каралган.
Келечекте долбоор жылына 30 миллион тоннага чейин руда иштетүүгө жана Кыргызстанда металлургиялык кластер түзүүгө мүмкүнчүлүк бермек. Бирок бул үчүн ири инвестициялар, заманбап технологиялар жана жогорку квалификациялуу адистер талап кылынарын экс-премьер баса белгиледи.
Эске салсак, буга чейин «Кумтөрдүн» мурдагы тышкы башкаруучусу Теңгиз Бөлтүрүк, мамлекетке 1 миллиард сомдон ашык зыян келтирген деп күнөөлүү деп табылганына карабастан, Жетим-Тоо кенин иштетүүнү жетектөөгө даяр экенин билдирген.
