Кыргыз Республикасынын Ички иштер министрлиги соттон жана тергөөдөн качып кеткен адамдарды өз өлкөсүнө экстрадициялоо жана кылмыш жоопкерчилигине тартуу максатында издөө жана кармоо боюнча иш-чараларды улантууда.
Испаниянын жана Болгариянын Интерполу, Кыргыз Республикасынын Башкы прокуратурасы жана Тышкы иштер министрлиги, Түркиянын Юстиция министрлиги менен биргелешкен иш-чаралардын натыйжасында Интерпол аркылуу эл аралык издөөдө жүргөн эки жаран кармалып, экстрадицияланды.
2023-жылдын 22-февралында Кыргыз Республикасынын Ички иштер министрлигинин Интерпол Улуттук борбордук бюросунун жана Кылмыш иликтөө башкы башкармалыгынын кызматкерлери Испаниядан мекенине 2001-жылы туулган Э.уулу А. алып келишкен. Ал ден-соолукка оор залал келтиргендиги үчүн Бишкек шаарынын Ленин райондук ички иштер башкармалыгы тарабынан 2021-жылдан бери издөөдө жүргөн.
Ошондой эле, үстүбүздөгү жылдын 15-февралында Болгариядан Бишкек шаардык ички иштер башкы башкармалыгы тарабынан 2019-жылдан бери издөөдө жүргөн 1992-жылы туулган И.Д. алынып келинген. Анын мыйзамсыз ишмердүүлүгүнөн келтирилген зыян 19 миллион АКШ долларын түзөт.
Экөө тең Интерпол тарабынан эл аралык издөөгө алынган.
