2026-жылы 17 чакан ГЭСтерди пайдаланууга берүү пландалууда
Кыргызстанда чакан гидроэлектр станцияларын куруу долбоору кандай өнүгүп жатканы тууралуу «Биринчи радио» эфиринде энергетика министри Таалайбек Ибраев айтып берди.
Анын айтымында, 2026-жылы 17 объектти пайдаланууга берүү пландалууда, алардын экөө буга чейин ишке кирди. 2030-жылга чейин чакан ГЭСтердин жалпы кубаттуулугун 400 мегаваттка жеткирүү көздөлүүдө.
Министр белгилегендей, мисалы, Сокулук районунда эки чакан ГЭС буга чейин эле аймакты электр энергиясы менен камсыздап жатат, ошондой эле жаңы жумуш орундар түзүлгөн.
Жыл сайын бюджетке болжол менен 30 миллион сом салык түшүүдө.
Учурда республика боюнча болжол менен 40–45 чакан ГЭС иштеп жатат. Мындан тышкары, Орто-Токой жана Папан суу сактагычтарында дагы жаңы станцияларды куруу пландалууда.
Долбоорлорго жеке инвесторлор да активдүү тартылууда. Алар үчүн жагымдуу шарттар каралган, мисалы, өндүрүлгөн электр энергиясын мамлекет тарабынан кепилденген сатып алуу мүмкүнчүлүгү бар, деп кошумчалады Таалайбек Ибраев.
