Орус паспорту бар борбор азиялыктарга Орусиядан чыгууга тыюу салынды

«Орусиянын жарандыгын алган кыргызстандык менен тажикстандыктарга өлкөдөн чыгууга тыюу салынды, бул мобилизацияга байланыштуу» деп жазат «Холод» басылмасы.

Басылма кыргызстандык 50 жаштагы Бекболот пландалгандай 22-декабрда Казакстанга кете албай калганын жазды. Ал жаран орус паспортун бир нече жыл мурун алган. «Орус чек арачылары мени мобилизациялык тизмеге киргенимди абдан сылык түшүндүрүштү. Бул мыйзам боюнча мен 12-февралга чейин чет өлкөгө чыгууга укугум жок», — деген Бекболот.