10 айда туннелдер аркылуу жүрүү үчүн 200 миллион сом чогулду
Үстүбүздөгү жылдын он айында «Сосновка» жана «Кара-Көл» өткөрмө бекеттеринде 200 миллион сом чогултулган. Бул тууралуу Жогорку Кеңештин жыйынында транспорт жана коммуникация министринин орун басары Бекназар Базаралиев билдирди.
Анын айтымында, 2020-жылы тоннелдер аркылуу жүрүү акысынын суммасы 64 миллион сом, 2021-жылы 71 миллион, 2022-жылы 145 миллион, 2023-жылы 197 миллион сом болгон.
Үстүбүздөгү жылы аталган өткөрүү пункттары аркылуу унаалардын өтүү интенсивдүүлүгү 2 миллион 890 миң автоунааны түздү.
Депутат Руслан Жакишев министрдин орун басарына «Сосновка» көзөмөл-өткөрүү пунктунун ишине нааразы болду.
«Бул өткөрмө пунктунда дайыма унаалардын чоң тыгыны болот. Унааларды текшерүүгө укугуңуз жок, ар бир айдоочудан болгону 50-100 сомдон алып, ушундай кезектерди жаратасыз. Төрт посттун экөө гана иштеп жатат», — деди ал.
Бекназар Базаралиев баардык посттордун кызматкерлеринин дайыма иш ордунда болушун камсыздап, төрт пост аркылуу автоунааларды өткөрө турганын айтты.
