УКМК: Өзбекстандын жараны баңгизат алып өтүү аракети үчүн кармалды — ВИДЕО
Бул тууралуу УКМКнын маалымат борборунан билдиришти.
Маалыматта айтылгандай, үстүбүздөгү жылдын 10-мартында жүргүзүлгөн ыкчам иш-чаралардын натыйжасында УКМК кызматкерлери тарабынан эл аралык баңги кылмыштуу тобунун активдүү мүчөсү кармалды.
Тактап айтканда, 1997-жылы туулган Өзбекстан Республикасынын жараны Д.Ж.Н. Кыргыз Республикасынан Өзбекстан Республикасынын аймагына мамлекеттик чек аранын начар корголгон участоктору аркылуу баңгизаттарды ташуунун туруктуу каналын уюштургандыгы аныкталды. Ошентип, кезектеги 1 кг «гашиш» баңгизатын өткөрүп берүү аракетинде кармалды.
Тергөө аракеттеринин жыйынтыгы боюнча Өзбекстан Республикасынын жараны Д.Ж.Н. КР Кылмыш-жаза кодексинин 282-беренесинин 3-бөлүгүндө каралган кылмыш фактысы боюнча катталган кылмыш ишинин алкагында КР УКМКнын убактылуу кармоочу жайына киргизилди.
Учурда башка тиешеси бар адамдарды аныктоо боюнча тиешелүү ыкчам иш-чаралар жүргүзүлүүдө.
