«Манас» эл аралык аэропортунда тумандан улам авиарейстер кечигүүдө
«Манас» эл аралык аэропортунда тумандан улам авиарейстер кечигүүдө. Бул тууралуу «Кыргызстан аэропорттору» ААКнын басма сөз кызматы билдирди.
Маалыматка ылайык, Анталия, Казань жана Шарм-эль-Шейх багыттарына караган үч таңкы рейс кечиктирилди.
Белгиленгендей, айрым учурларда көрүнүү аралыгы 300 метрге чейин төмөндөп, бул учактардын коопсуз учуусуна жана конушуна мүмкүндүк бербей жатат. Ушуга байланыштуу саат 11:00гө чейин учуу графигинде кошумча өзгөрүүлөр болушу мүмкүн.
Жүргүнчүлөргө өз рейстеринин абалын авиакомпаниялардан тактап, маалыматтын жаңылануусуна көз салып туруу сунушталат.
«Манас» аэропортунда туманга байланыштуу олуттуу көйгөйлөр 2025-жылдын аягынан тарта байкала баштаган.
Эске салсак, аэропортко экинчи категориядагы жаңы жарык-сигналдык система орнотулган. Учурда үчүнчү категориядагы жабдууларды орнотуу иштери уланууда, бирок татаал метео шарттарында конуу тууралуу акыркы чечим ар дайым аба кемесинин экипажы тарабынан кабыл алынат.
