Орусиялык студенттер Кыргызстандагы мектептердин курулушуна көмөктөшөт
Омск облусунун студенттери Кыргызстанда Орусия куруп жаткан мектептердин курулушуна жардам беришет.
Маалыматка ылайык, Орусиянын студенттик курулуш отрядынын 10 мүчөсү эки ай бою Бишкектеги «Мостострой-11» компаниясынын курулуш объектилеринде эмгектенет.
Бул — Омск облусунун студенттик отряддарынын Кыргызстандагы алгачкы эмгек миссиясы. Ага Сибирь мамлекеттик автомобиль-жол университетинин студенттери катышууда. Алардын негизги милдети — Кыргызстан менен Орусиянын биргелешкен долбоорунун алкагында салынып жаткан жаңы мектептин курулушуна катышуу.
Эске салсак, жакынкы жылдары Орусия Кыргызстандын бардык аймактарында жалпысынан тогуз мектеп курууну пландап жатат.2023-жылдын 1-сентябрында Бишкек, Баткен жана Каракол шаарларында мектептердин курулушуна капсула салуу аземи өткөн. Курулуш иштери 2024-жылы башталган. План боюнча жыл сайын үчтөн окуу жайы курулат.
