Насирдин Юсупов жана үй-бүлөсү Садыр Жапаровго кайрылуу жасады

Насирдин Юсупов жана анын үй-бүлөсү Президент Садыр Жапаровго кайрылып, өзүнүн жана үй-бүлө мүчөлөрүнүн укуктарын коргоону өтүнүштү.

Кайрылууда Насирдин Юсупов жана анын үй-бүлөсү УКМКнын Чүй облустук башкармалыгынын мурдагы кызматкерлери тарабынан бир нече ай бою кысымга, коркутууларга  кабылганын, укуктары одоно бузулгандыгы тууралуу айтылат.

Насирдин Юсупов 85 жашта экенин белгилей кетүү керек; ал — өлкөнүн көрүнүктүү жана кадыр-барктуу инсандарынын бири, “легендарлуу парламенттин” мурдагы депутаты, ошондой эле өмүрүн ишкердикке жана кайрымдуулукка арнаган инсан. Ал — Кыргыз Республикасынын эмгек сиңирген куруучусу жана Бишкек шаарынын ардактуу атуулу.

“Бул окуя 2024-жылдын октябрь айында башталган.  Алгач баарыбызды УКМКга чакырып, ал жерде  бизди эртең мененден кечке чейин кармап, эмне үчүн чакыргандарын жана эмне максатта келгенибизди түшүндүрүшкөн жок,” — дейт жабырлануучулар.

Андан кийин алар 85 жаштагы аксакал Насирдин Юсуповду өз ыктыяры менен, бирок ошол эле учурда мажбурлоо менен, мүлкүн өткөрүп берүүгө  кысым көрсөтүп, коркутуп-үркүтүп «сүйлөшүүлөрдү» жүргүзүшкөн.

Насирдин Юсуповго балдары жана неберелеринин келечеги жөнүндө ойлонуу керектигин ачык айтып, коркутушкан.

Ошол учурда үй-бүлө оор жоготууга дуушар болуп, үй-бүлөдөгү эң маанилүү адамды – Насирдин Юсуповдун жубайын жерге беришкен.

Үй-бүлөдөгү мындай чоң жоготуу, трагедияга карабастан, Агенттиктин айрым кызматкерлери үй-бүлө мүчөлөрүнүн баарын суракка чакырууну, коркутуп-үркүтүүнү жана аларга катуу кысым көрсөтүүнү токтотушкан жок.

Алар кылмыш жоопкерчилигине тартабыз деп коркутушкан.

Ошондон кийин алардын үй-бүлөсүндө чыныгы тозок башталганын айтышты.

Насирдин Юсуповдун жалгыз уулуна каршы кылмыш иши козголгон. Ал кармалып, алты ай бою тергөө абагында камалган.

Абакта жатканда аны менчик, мыйзамдуу жеринен баш тартууга мажбурлашкан.

Бирок мекеменин кызматкерлери муну менен эле токтоп калышкан жок — алар Насирдин Юсуповго каршы да  кылмыш иш козгошкон. Алар 85 жаштагы Юсуповдун мыйзамдуу, ак ниеттүүлүк менен бир кездерде сатып алган мүлкүн тартып алууну көздөшкөн.

Жабырлануучулардын айтымында 1995-жылы — Насирдин Юсупов депутаттык ыйгарым укуктары аяктагандан кийин («легендарлуу парламент» 1994-жылы таратылган) — анын жубайы «Ала-Тоо» ААКынын 8,8% үлүшүн ЦУМ универмагынын алтынчы кабатында (аукциондор өткөрүлүүчү жайда) өткөрүлгөн ачык аукцион аркылуу сатып алган.

Ал мезгилде Советтер Союзу кулап, мамлекеттик чарбалар ачык акционердик коомдорго айландырылган; кызматкерлер акционерлерге айланып, акциялардын 75%ы жеке менчикке, ал эми 25%ы мамлекеттин карамагына өткөн. Мамлекет өзүнө таандык акцияларды аукционго койгон, ошондо жубайы 10 000 долларга 8,8% үлүштү сатып алган экен.

«Ал кезде мындай суммага үч бөлмөлүү үч батир сатып алууга болмок. Насирдин Юсуповдун жубайы өмүр бою соода тармагында  эмгектенип; Советтер Союзу кулагандан кийин ал дагы соода менен алектенип, «челночник» болуп иштеген. Насирдин Юсупов парламенттен кеткенге чейин да, андан кийин да бизнес менен алектенген — ал эми мындай иштин канчалык тобокелдүү экенин баарыбыз билебиз», — деп айтылат билдирүүдө.

Билдирүүдө ачык акционердик коомдогу сатылып алынган акциялар менчиктештирүүгө тиешеси жок экени — алар менчиктештирүү процесси аяктагандан кийин сатылып алынганы — жана үй-бүлө мүчөлөрү ак ниеттүү, мыйзамдуу сатып алуучулар экени белгиленген.

Алар шарап өндүрүүчү мамлекеттик чарбанын карыздарын төлөө үчүн өз каражаттарын жана күч-аракетин жумшашкан. Бул оор мезгил болчу; бардык ишканалар токтоп калган кез эле.

Ошондой эле, ишкананын Насиридин Юсупов акционер болгонго чейин берилген жабдуулар үчүн немис өнөктөштөрүнө 2 миллион германиялык марка өлчөмүндөгү карызы болгон.

Насирдин Юсупов ишкананы кайра иштетип гана тим болбостон, анын бардык карыздарын төлөп берген.

Андан тышкары, ал аны бүгүнкү күнгө чейин сактап калган.

1990-жылдары агрардык реформадан кийин мамлекеттик жүзүм чарбанын сугат жерлери жергиликтүү тургундарга жер үлүш катары берилген. Ишкананын өзүнө таандык жерлери гана сакталып калган.

Насирдин Юсупов жана анын жубайы — ак ниет сатып алуучулар жана ата мекендик инвесторлор.

Ал эми аларга коюлган айыптоолор абсурд жана негизсиз; ошого карабастан, биринчи инстанциядагы сот — тергөөчүлөр коркуткандай — мүлктү конфискациялоону буйрук кылды. Сот процессинин өзү одоно мыйзам бузуулар менен коштолду. Адилеттүүлүккө болгон ишеним негизсиз болуп чыкты.

Сот процесси катуу кысым астында өттү: Насиридин Юсупов катуу ооруп калды — ал 85 жашта, ал улам бир кемсинтүүлөр жана коркутуулар ден соолугуна олуттуу көйгөйлөрдү жаратты.

Бирок Аламүдүн райондук сотунун судьясы Т. Т. Шанкаев соттук отурумду ооруканада өткөрүп, дал ошол жерде — палатада, карыган жана оорулуу кишинин керебетинин жанында — анын өзүнүн гана эмес, бардык балдары менен неберелеринин да мүлкүн конфискациялоо тууралуу чечим чыгарды.

Анын адвокаттарынын айтымында, сот өкүмүндө айыптоо корутундусун сөзмө-сөз окуп берген. Бул 2025-жылдын декабрь айында болгон.

Насирдин Юсупов чарчаганына карабастан, багынып берүүдөн баш тартып, соттук күрөштү улантууну чечкен.

«2025-жылдын 10-февралындагы окуялардан кийин — анын жыйынтыгында Элдар Жакыпбеков жетектеген УКМКнын башкармалыгынын кызматкерлери кармалган — бизде үмүт учкуну пайда болду. Бир саамга адилеттүүлүккө ишенип, Аскер прокуратурасына кайрылдык,»- дейт жабырлануучулар.

Чүй облустук сотуна апелляциялык арыз түшкөн.

Бирок, белгилүү болгондой, азырынча эч нерсе бүтө элек…

Ал кызматкерлер жок, бирок корпоративдик рейдерлик уланууда. Неге?

3-июлда Чүй облустук соту төмөнкү баскычтагы соттун чечимин — Насирдин Юсуповго гана эмес, анын балдары менен неберелерине да таандык мүлктү конфискациялоо чечимин — күчүндө калтырды.

Ирина Воронцова төрагалык кылган соттук коллегия өзүнүн чечими менен биздин гана эмес, корпоративдик рейдерликтин курмандыгы болгон башка адамдардын да ишенимин талкалады.

Воронцова мүмкүн болгон бардык эрежелерди бузду. Ал чечим кабыл алууга ушунчалык шашылып — кудум «атасынын жерлери башка бирөөгө эбак эле убада кылынып коюлгандай» таасир калтырды.

Биринчи инстанциядагы сот өз чечимин чыгарып жаткан маалда

Насирдин Юсупов ошол кезде катуу ооруп калып, сот жыйынына өзү катышуу  үчүн ишти бир жумага токтото турууну өтүнгөн. Бирок судья бул өтүнүчтөрдү эске албай, аксакалдын жашоосу толугу менен дары-дармектерге көз каранды болгонуна карабастан аны сот жыйындарына мажбурлоо жолу менен алып келген.

Ошондон улам, Насирдин Юсуповду сотко мажбурлап алып келиши үчүн ооруканадан чыгарылган. Оорусу анын сот отурумуна катышуусуна тоскоол болгондуктан, апелляциялык соттун судьясы Воронцова ал жок учурда чечим чыгарган.

«Ал жактоочунун өтүнүчтөрүн кароодон баш тартып, жана журналисттерге сүрөткө тартууга же аудио жаздырууга да уруксат берген жок. Андан тышкары, ал жактоочу күбөлөрдү сотко чакырган жок; сот процесси Насирдин Юсуповдун укуктарынын көптөгөн бузулушу менен өттү. Натыйжада мыйзамсыз чечим кабыл алынды», — деп айтылат билдирүүдө.

Насирдин Юсупов жана анын үй-бүлөсү мамлекет башчысына кайрылуу жасап,алардын укуктарын коргоону жана адилеттүүлүктү калыбына келтирүүнү өтүнүп жатышат.

Н.Юсуповдун үй-бүлөсү президенттен укуктарын мыйзам чегинде коргоп берүүнү өтүнөт.