Баткенде чек арада курулган жаңы ооруканада 5 наристе төрөлдү
Баткен районунун Самаркандек айылында жаңы курулган оорукананын төрөт бөлүмүндө үч уул жана эки кыз жарык дүйнөгө келди. Эне-балдардын абалынан президенттин Баткен облусундагы өкүлү Абдикарим Алимбаев кабар алып, белектерин тапшырды. Бул тууралуу облустагы өкүлчүлүктөн кабарлашты.
Облус башчысы наристелерге узун өмүр, бекем ден соолук каалап, кыргыздын керегине жараган уул-кыздардан болушуна тилектештигин билдирди.
Белгилей кетсек, аталган оорукана облус борборунан 50 чакырым алыстыктагы чек ара айылдарынын калкына медициналык кызмат көрсөтөт.
Бейтапкана үстүбүздөгү жылдын 11-декабрында президент Садыр Жапаровдун катышуусунда салтанаттуу ачылып, пайдаланууга берилген.
Аталган оорукана чек арада жайгашкан Самаркандек, Ак-Сай, Ак-Татыр айыл аймактарынын социалдык көйгөйүн жеңилдетүү максатында мамлекет башчысынын жеке колдоосу менен курулган. Ал жалпы 75 орунга ылайыкташкан.
