Ысык-Көл районунун милиция кызматкерлери селдин кесепеттерин жоюуга активдүү катышууда
Жакында Ысык-Көл районунда жааган нөшөрлүү жаан-чачындын кесепетинен сел жүрүп, бир нече калктуу конуштарга өзүнүн зыянын алып келди. Ысык-Көл районунун Ички иштер бөлүмүнүн кызматкерлери өзгөчө кырдаалга ыкчам жооп кайтарып, жаратылыш кырсыгынын кесепеттерин жоюуга активдүү катышууда.
Милиция кызматкерлери жергиликтүү бийлик өкүлдөрү, Өзгөчө кырдаалдар министрлигинин жергиликтүү бөлүмүнүн кызматкерлери жана ыктыярчылар менен биргеликте жабыркаган тургундарга жардам көрсөтүүдө. Аракет биринчи кезекте сел алып келген ылайга жана таштандыга толгон короолорду жана үйлөрдү тазалоого багытталган. Милициянын ондогон кызматкерлери куткаруу жана калыбына келтирүү иштерине күнү-түнү катышууда.
Жабыр тарткан аймактарда коопсуздукту камсыз кылууда милициянын маанилүү ролу турат. Райондук милициянын кызматкерлери жабыркаган аймактарда күзөт иштерин жүргүзүп, эң кооптуу конуштарда калган жергиликтүү тургундарга көмөк көрсөтүп, тартипти көзөмөлдөп, жарандардын үйлөрүндө калган мүлктөрүн кайтарууда.
Ысык-Көл районунун Ички иштер бөлүмүнун башчысы Жумгалбек Абиев милиционерлер укук тартибин сактоо боюнча өздөрүнүн түздөн-түз милдеттерин гана аткарбастан, жергиликтүү калктын нормалдуу жашоо шарттарын калыбына келтирүү боюнча социалдык маанилүү иштерге да активдүү катышып жатканын белгиледи.
«Мындай оор күндөрдө, биздин кызматтын маанилүүлүгүн түшүнөбүз. Биздин кызматкерлер кырсыктын кесепеттерин мүмкүн болушунча тез арада жоюу жана адамдарга кадимки жашоосуна кайтууга жардам берүү үчүн толук кандуу иштеп жатышат», – деп баса белгиледи ал.
Милициянын жана башка кызматтардын жүргүзүлгөн тыгыз аракеттеринин аркасында бир катар үйлөр тазаланып, ылай жана таш менен тосулган бир нече көчөлөр калыбына келтирүүгө мүмкүн болду. Жаратылыш кесепеттерин жоюу иштери улантылууда жана Ысык-Көл райондук милиция кызматкерлери бардык зарыл иш-чаралар толук аяктаганга чейин жер-жерлерде кызмат өтөшөт.
