Тимур Ибрагимов Дзюдо федерациясынын президенти болду
Бишкекте Кыргыз Республикасынын Дзюдо федерациясынын кезексиз конференциясы өтүп, анда уюмдун жаңы жетекчиси шайланды. Добуш берүүнүн жыйынтыгында федерациянын президенти кызматына башкаруучу жана финансист Тимур Ибрагимов дайындалды.
Шайлоо спорт коомчулугунун толук колдоосу менен өтүп, Ибрагимовдун талапкерлигин жыйынга катышкан 108 делегаттын баары бир добуштан колдоду. «Каршы» жана «калыс» добуштар болгон жок.
Тимур Ибрагимов жаңы кызматындагы алгачкы сөзүндө жетекчилик кызматты ээлөө — биринчи кезекте спортчулардын жана жалпы өлкөнүн алдында чоң жоопкерчилик экенин белгиледи.
«Спортчубуз мамлекеттик желек астында татамиге чыкканда, анын артында бүтүндөй өлкө турат. Ал эми ар бир жогорку көрсөткүчтүн артында машыктыруучулардын, дарыгерлердин жана федерациянын бүтүндөй командасынын күнүмдүк оор эмгеги жатат.
Банк тармагында мен бардык процесстерге жеке аралашып, жамаатты угуп, чечим кабыл алып, ал чечимдер үчүн жооп берүүгө көнгөм. Эң туура чечим да туура ишке ашырылып, натыйжа бергенде гана баалуу болот деп эсептейм. Дал ушундай ыкманы федерациянын ишинде колдонууга ниеттенип жатам», — деди Ибрагимов.
Белгилей кетсек, Тимур Ибрагимов — финансылык-банк тармагында бай тажрыйбага ээ топ-менеджер. 2026-жылдын 12-январынан тарта ал «Бакай Банк» ААКнын башкармалыгынын төрагасы кызматын да ээлеп келет.
