Чүй облусунда «Төмөнкү-Чүй – автожол» өткөрүү пунктунун жаңы комплексинин курулушу башталды
Чүй облусунун Сокулук районуна караштуу Камышановка айылында кыргыз-казак чек арасындагы «Төмөнкү-Чүй – автожол» эл аралык өткөрүү пунктунун жаңы комплексинин курулушу башталды. Бул тууралуу Мамлекеттик чек ара кызматы билдирди.
Маалыматка ылайык, жаңы комплекс 33 гектар аянтка жайгашып, күнү-түнү иштейт. Долбоор жарандардын, транспорт каражаттарынын жана жүктөрдүн чек арадан өтүү убактысын кыскартууга, кезектерди азайтууга багытталган.
Өткөрүү пунктунда унаалар үчүн сегиз кыймыл тилкеси, паспорттук көзөмөл үчүн 12 кабина жана E-gate автоматташтырылган электрондук өткөрүү системалары орнотулат. Ошондой эле административдик имараттар, унааларды текшерүүчү жайлар жана атайын аянтчалар курулат.
Долбоор республикалык бюджеттин эсебинен каржыланып, курулуш иштерин аяктоо мөөнөтү 24 айды түзөт.
Жаңы комплекс Кыргызстан менен Казакстандын ортосундагы транспорттук байланышты жана соода-экономикалык кызматташтыкты өнүктүрүүгө шарт түзөт.
