Бишкекте 3 жашар баланы сүзгөн адам убактылуу кармоочу жайга киргизилди

Борбор калаада 3 жаштагы баланы унаа сүзүп кеткенден улам каза тапты. Бул тууралуу КР ИИМ Жол кыймылынын коопсуздугун камсыздоо башкы башкармалыгынын басма сөз кызматы билдирди.

Маалыматка ылайык, 20-октябрда саат 18:40 чамасында Б.А.Т. аттуу 39 жаштагы айдоочу GMC ACADIA үлгүсүндөгү автоунаасы менен Бишкек шаарынын «Азия Молл» соода борборунун жанында Ч.Айтматов-Алтымышев көчөлөрдүн кесилишинде күн батыш багытта бара жатып, 3 жашар наристени сүзүп алган. Кыз жаракаттарынан улам каза тапкан.

Бул окуядан кийин кылмыш иши козголгон. Айдоочу кылмышка шектүү катары кармалып, Бишкек шаардык милициясынын убактылуу кармоочу жайына киргизилген.