Президенттин атынан турмуштук оор кырдаалга кабылган үй-бүлөлөрдүн балдарына жардам көрсөтүлдү
Бүгүн, 7-январда Кыргыз Республикасынын президенти Садыр Жапаровдун атынан турмуштук оор кырдаалга кабылган үй-бүлөлөрдүн балдарына жардам көрсөтүлдү. Бул тууралуу президенттин басма сөз кызматы билдирет.
Алсак, республиканын бардык аймактарынан ата-энелеринин балдарын мектепте багууга жана окутууга каржылык мүмкүнчүлүгү жок 201 бала зарыл кийим-кече, мектеп формасы жана окуу куралдары менен камсыздалды.
Ар бир мектеп окуучусу рюкзак, костюм, 2 даанадан шым же юбка, свитер, 3 көйнөк, 3 футболка, куртка, өтүк, шарф, мээлей, баш кийим, өнүктүрүүчү окуу китептери жана кеңсе буюмдарын (калем, карандаш, сызгыч, өчүргүч ж.б.) алышат.
Иш-чарага Кыргыз Республикасынын Эмгек, социалдык камсыздоо жана миграция министрлигинин, Кыргыз Республикасынын Президентинин Иш башкармалыгынын өкүлдөрү жана башкалар катышты.
Президент Садыр Жапаровдун тескемеси менен турмуштук оор кырдаалга кабылган үй-бүлөлөрдүн 201 баласына жардам көрсөтүү үчүн Мамлекет башчынын резервдик фондунан 5 млн сом өлчөмүндө акча каражаты бөлүнгөн.
Белгилей кетсек, Президенттин облустардагы ыйгарым укуктуу өкүлдөрү жана Бишкек жана Ош шаарларынын башчылары Президенттин атынан балдарга белектерди өз убагында жеткирүү жана тапшырууга жооптуу болушат.
