Окуучулар арасында Манас айтуу боюнча сынак өтөт
Эртең, 25-декабрда, «Манас» эпосун даңазалоо максатында окуучулар арасында Манас айтуу боюнча республикалык кароо-сынактын финалы өтөт. Бул тууралуу уюштуруучулардын бири, манасчы Нурбек Талантбеков билдирди.
Анын айтымында, конкурстун тандоо туру аймактарда 19-декабрда болгон. Бул ирет сынак балдар жана кыздардын арасында өз-өзүнчө өтмөкчү.
«1-6-класстын окуучулары «Сейтек» билим берүү мектебинде, ал эми 7-11-класстар «Айчүрөк» кыздар лицейинде таймашат. Иш-чарага Назаркул Сейдарахманов, Дөөлөт Сыдыков баштаган белгилүү манасчылар калыстык кылат. Сынактын байге фонду — 150 миң сом», — деди Талантбеков.
Конкурска 44 райондон тандалган 200 мектеп окуучусу катыша турган болду. Тандоо туру 19-декабрда өткөн.
Иш-чара Маданият, маалымат, спорт жана жаштар саясаты министрлигинин алдындагы Улуттук маданий борбор, мамлекеттик «Манас» театры, манасчылар уюму жана «Сапат» эл аралык билим берүү мекемеси тарабынан уюштурулууда.
