«Айкөл Манас» эстелигин Токтогулга өткөрүп берүү сунушталды
Бишкек шаардык кеңеши борбор калаанын мэриясынын Ала-Тоо аянтынан алынган «Айкөл Манас» эстелигин мамлекеттик менчикке өткөрүп берүү боюнча кайрылуусун карашы керек. Тиешелүү документ БШКнын сайтында жарыяланды.
Документте бул чечим эстеликтин сакталышын камсыз кылуу жана Кыргызстандын мыйзамдарына ылайык улуттук мурасты натыйжалуу пайдалануу максатында кабыл алынып жатканы айтылат.
Маалымкат-негиздемеге ылайык, 2026-жылдын август айында Бишкек мэриясына Токтогул райондук мамлекеттик администрациясы кайрылган. Анда Ала-Тоо аянтынан алынган, баасы 15 млн 36 миң 663 сом 71 тыйын болгон «Айкөл Манас» эстелигин Токтогул шаарында туризмди өнүктүрүү, улуттук мурасты жайылтуу жана жаш муунду тарыхый-маданий баалуулуктар менен тааныштыруу үчүн өткөрүп берүү өтүнүчү айтылган.
Токтомго ылайык, эстеликти өткөрүп берүү акысыз негизде жүргүзүлөт. Ал эми аны ташуу жана орнотуу чыгымдарын ким көтөрөрү документте так көрсөтүлгөн эмес.
Эске салсак, Ала-Тоо аянтындагы «Айкөл Манас» эстелиги 2011-жылы орнотулган. Анын автору — скульптор Базарбай Сыдыков.
Манас ат үстүндө сүрөттөлгөн айкелдин бийиктиги 10 метр, постаменти менен жалпы бийиктиги 17,5 метрге жакын. Автордун айтымында, ал эстеликтин идеясын 20 жыл бою ойлонуп, Манастын образында кыргыз элинин жыйнак образын чагылдырууга аракет кылган.
