Маданият министрлигине гимн боюнча 439 кайрылуу түштү
Маданият, маалымат, спорт жана жаштар саясаты министрлиги мамлекеттик гимндин тексти жана музыкасы үчүн жарыяланган сынактын алкагында 23 долбоор кабыл алынганын билдирди.
Жалпы 279 жарандан 439 кайрылуу түшкөн, анын ичинен талаптарга толук жооп берген 23 долбоор кабыл алынды.
7-февралда гимнди өзгөртүү боюнча мекеме аралык комиссиянын биринчи отуруму өтүп, анда гимндин текстинин жана музыкасынын жаңы вариантына сынак жарыяланары маалым болгон. Гимндин тексти менен музыкасын иштеп чыгуу жараяны июнь айына чейин уланып, соңунда комиссия Жогорку Кеңешке үч вариантты сунуштай турган болгон.
Сынактын жеңүүчүсүнө 1 млн 500 миң сом берилет. Экинчи орунга 1 млн, үчүнчү орунга 500 миң жана төртүнчү, бешинчи орундарга 250 миң сомдон каражат тапшырылат.
